2Ch 12 | NdeIBE | STEP | Ngemva kokuba uRehobhowami eselamandla, lombuso wakhe usuqinile, yena kanye labo bonke abako-Israyeli bawudela umlayo kaJehova.

2 Chronicles 12

UShishaki Uhlasela IJerusalema

1 Ngemva kokuba uRehobhowami eselamandla, lombuso wakhe usuqinile, yena kanye labo bonke abako-Israyeli bawudela umlayo kaJehova. 2 Kodwa ngoba bona kuJehova, uShishaki inkosi yaseGibhithe wahlasela iJerusalema ngomnyaka wesihlanu wokubusa kwenkosi uRehobhowami.

3 Wahlasela ngezinqola zokulwa ezingamakhulu alitshumi lambili labagadi bamabhiza abayizinkulungwane ezingamatshumi ayisithupha, labantu abangelakubalwa ubunengi babo abanye bengabeLibhiya, lamaSukhi labaKhushi abeza laye bevelela ngaseGibhithe, 4 wathumba imizi yakoJuda ebiyelweyo waze wayafika leJerusalema.

5 Ngakho uShemayiya umphrofethi waya kuRehobhowami kanye lakubakhokheli bakoJuda ababebuthene eJerusalema ngokwesaba uShishaki, wafika wathi kubo, “Nanku okutshiwo nguJehova uthi, ‘Lingilahlile lina; ngakho sengilinikela kuShishaki.’ ”

6 Abakhokheli bako-Israyeli lenkosi yabo bazithoba batsho bathi, “UJehova ulungile.”

7 Kwathi uJehova esebonile ukuzithoba kwabo ilizwi lakhe lafika kuShemayiya lisithi: “Njengoba bezithobile, kangisayikubabhubhisa, kodwa ngizabakhulula emva kwesikhatshana, lolaka lwami kalusayikwehliselwa eJerusalema ngesandla sikaShishaki. 8 Kodwa bazakuba yizinceku zakhe ukuze bazi umahluko phakathi kokungikhonza lokukhonza amakhosi amanye amazwe.”

9 UShishaki inkosi yaseGibhithe wasehlasela iJerusalema, wabutha yonke inotho yasethempelini likaJehova kanye lenotho yasesigodlweni sesikhosini. Wathatha konke waze wathatha lezihlangu zegolide ezazenziwe nguSolomoni. 10 Ngakho iNkosi uRehobhowami yasisenza izihlangu zethusi endaweni yalezo njalo yazibeka ngaphansi kwabalawuli babalindi bamasango asesigodlweni sesikhosini. 11 Kwakusithi lapho inkosi isiya ethempelini likaJehova, abalindi babehamba layo bephethe izihlangu, kuze kuthi emva kwesikhathi bazibuyisele endlini yabalindi.

12 Ngenxa yokuthi uRehobhowami wazithoba, ulaka lukaJehova lwadeda kuye, kasazange abe esabhujiswa. Ngempela kwakukhona okuhle koJuda.

13 Inkosi uRehobhowami yaqinisa umbuso wayo eJerusalema njalo yaqhubeka ibusa. Ekugcotshweni kwakhe ubukhosi wayeleminyaka engamatshumi amane lanye, wabusa okweminyaka elitshumi lesikhombisa eJerusalema umuzi kaJehova ayewukhethile phakathi kwezizwana zako-Israyeli ukuze abeke iBizo lakhe. Ibizo likanina linguNahama, engowako-Amoni. 14 Wenza okubi wona ngoba engazange abeke inhliziyo yakhe ekumdingeni uJehova.

15 Okumayelana lokubusa kukaRehobhowami, kusukela ekuqaleni kuze kube sekupheleni, akulotshwanga na emibhalweni kaShemayiya umphrofethi leka-Ido umboni mayelana lokuzalana kwabantu? Kwaba lempi njalo phakathi kukaRehobhowami loJerobhowami.

16 URehobhowami waya kubokhokho bakhe wambelwa eMzini kaDavida. U-Abhija, indodana yakhe, waba yinkosi ngemva kukayise.